ភ្នំពេញ៖ ក្រសួងព្រះបរមរាជវាំង នឹងបើកដំណើរការឱ្យភ្ញៀវទេសចរជាតិ-អន្តរជាតិចូលទស្សនាឡើងវិញ ចាប់ពីថ្ងៃទី០១ ខែធ្នូ ឆ្នាំ២០២២តទៅ។ នេះបើតាមលិខិតរបស់ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំងដែលផ្ញើជូនរដ្ឋមន្ត្រីក្រសួងទេសចរណ៍ចុះនៅថ្ងៃទី១៧ ខែវិច្ឆិកា ឆ្នាំ២០២២។
សូមរំលឹកថា ក្រសួងព្រះបរមរាជវាំង ត្រូវបានផ្អាកទទួលភ្ញៀវទេសចរជាតិ-អន្តរជាតិ តាំងពីមានការរាតត្បាតជំងឺកូវីដ-១៩ ថ្ងៃទី១៨ ខែមីនា ឆ្នាំ២០២០ ដោយកាលនោះរាជរដ្ឋាភិបាលក៏បានបិទ KTV ក្លឹបកម្សាន្តនានា រោងភាពយន្ត និងសារមន្ទីរនៅទូទាំងប្រទេសផងដែរ។ បច្ចុប្បន្នជំងឺកូវីដ-១៩ នៅកម្ពុជាស្ថិតក្នុងស្ថានភាពល្អប្រសើរដែលជំរុញឱ្យវិស័យនានា និងអាជីវកម្មផ្សេងៗបើកដំណើរការឡើងវិញ៕
